الدجاج محمر بالحامض و الزيتون اخضر – هدى اليداري

djaj-5
دجاجة مغسولة ومنقية بالليل ومسقطرة مزياان ونخليها بالجلدة
في بانيو : نص كاس عنبة ماء + 3 ثوم مدقوق او ممعوس + عصير نص حامضة + نص م ص السمن + نص م ص سكينجبير ربع م ص ابزار + شوية زعفران حر + خرقوم بلدي + نص م ص عطيرة الدجاج او ربع م ص بسيبيسة و ربع م ص الهيل او قعقلة + 2 حبات قرنفل + هبرة نص حامضة مرقدة مقطعة رقيق + نص م ص موطارد + الملح غير شوييية او بلاش منها حتى الاخير ونضيفها + بصلة صغيرة رقيقة + الربيع مقطع ونخلط وندهن بيه الدجاجة من بعد ما نتقبها بعود اسنان في الصدر تحت الجلدة ونخليها راقدة على الاقل نص ساعة او اكثر
نربط ليها الرجلين ديالها ونديرها في طنجرة بكل القوام ديالها ونخليها طيب على نار مهيلة وهي مغطية ونقلبها بشوية بشوية حتى يتقلى و ينشف الما ديالها ونضيف كاس كبير الما ونغطي الطنجرة ونخليها طيب تقريبا من 20 الى 30 دقيقة على نار مهيلة حتى يطيب + القشاوش ديالو
في الوقت اللي كطيب ناخد 2 بصلات كبار بيضاء نشلظهم رقاق بزاف ونديرهم في كاصرول او مقلة كبيرة معاهم شوية الزيت و عطرية الدجاج او قعقلة و بسيبيسة ونخليها تشحر على مهلها حتى تدبل
نحيد الدجاج من بعد ما طاب غير بشوية ونخليه يبرد في شي بلاصة في شبكة
مللي يبرد ندهنوا ب : م ك زبدة مرخوفة عامرة + عطرية الدجاج + نص م ص هريسة وندخلو الفران
البصلة اللي بقات نضيفها للمرق + نص كاس عنبة زيت ونغطيه ونخليه يطيب 20 دقيقة تقريبا حتى تنشف و تنسجم ونغطي غير نص الطنجرة باش تنشف
من بعد ما تنشف نعري البوطة ونمعك البصل حتى يتغير اللون ديالو
الزيتون اخضر بلا عظم طلع فيه الغلية 2 دقايق نصفيه ونديه ونجيبو في الدغميرة 5 دقايق فقط
من بعد نرجع الدجاج للمرق شوية و من بعد نقدمو مع قطع الحامض مصير